Sair dan Rantjak Ikan (Naskah Asli)
Pasang pelita di atas lankan,
Pasang koeping lah terang-terang,
Dengar tjerita segala ikan.
Pasang pelita di atas lankan,
Bikin loempang si kajoe asem,
Dengar tjerita segala ikan,
Ikan tjoepang lah pada mèsem.
Bikin loempang si kajoe asem,
Beli seré di Pesebrangan,
Ikan tjoepang lah pada mèsem,
Ikan tjetjéré kagirangan.
Beli seré di Pesebrangan,
Koewè mangkok di dalem tenong,
Ikan tjetjéré kagirangan,
lkan betok lah djadi bengong.
Koewé mangkok di dalem tenong,
Potong ketoepat atas pelita,
Ikan betok lah djadi bengong,
Ikan sepat atoer tjerita.
Potong ketoepat atas pelita,
Daon kaoeng di dalem tjobèk,
lkan sepat atoer tjerita,
Ikan baoeng mendjadi bèk.
Daon kaoeng di dalem tjobèk,
Bikin goendoe si kajoe djaran,
Ikan baoeng mendjadi bèk,
lkan loendoe djadi sarèan.
Bikin goendoe si kajoe djaran,
Bikin biting asalnja lidi,
Ikan loendoe djadi sarèan,
Ikan keting djadi toewidi.
Bikin biting asalnja lidi,
Orang menangkep si toekang laksa,
lkan keting djadi toewidi,
lkan kakap mendjadi djaksa.
Orang menangkep si toekang laksa,
Bikin toedoeng tali telepas,
Ikan kakap mendjadi djaksa,
Ikan lindoeng mendjadi oppas.
Bikin toedoeng tali telepas,
Orang mengoeroet di batang soeling,
Ikan lindoeng mendjadi oppas,
Ikan gerot mendjadi maling.
Orang mengoeroet di batang soeling,
Beli opak boenga mengkoedoe,
Ikan gerot mendjadi maling,
Ikan geropak mendjaga gardoe.
Beli opak boenga mengkoedoe,
Alang-alang toemboeh di doelang,
Ikan geropak mendjaga gardoe,
Ikan sembilang djadi pentjalang.
Alang-alang toemboeh di doelang,
Bikin petjoet bekas di raoet,
Ikan sembilang djadi pentjalang,
Ikan tjoetjoet djadi sekaoet.
Bikin petjoet bekas di raoet,
Orang mereboes si daon pandan,
Ikan tjoetjoet djadi sekaoet,
Ikan gaboes djadi adjidan.
Orang mereboes si daon pandan,
Dari Tjideng pegi di Padang,
Ikan gaboes djadi adjidan,
Ikan bandeng djadi kommandan.
Dari Tjideng pegi di Padang,
Pentang tali di kantor palis,
Ikan bandeng djadi kommandan,
Ikan sesili djadi djoeroetoelis.
Pentang tali di kantor palis,
Potong kole terpata-pata,
Ikan sesili djadi djoeroetoelis,
Ikan lele djadi mata-mata.
Potong kole terpata-pata,
Bikin daon bekas di ler,
Ikan lele djadi mata-mata,
Ikan wadon sampe mengiler.
Bikin daon bekas di ler,
Potong kenari di tengah sawa,
Ikan wadon sampe mengiler,
Ikan doeri sampe tetawa.
Potong kenari di tengah sawa,
Orang mengorek si koewe kerak,
Ikan doeri sampe tetawa,
Ikan peperek pada bersoerak.
Orang mengorek si koewe kerak,
Tepok laler di dalem mangkok,
Ikan peperek pada bersoerak,
lkan selar dateng menengok.
Tepok laler di dalem mangkok,
Petik kembang di pegoenoengan,
Ikan selar dateng menengok,
Ikan tembang kabingoengan.
Petik kembang di pegoenoeogan,
Sentiong ada koeboeran Tjina,
Ikan tembang kabingoengan,
Sang kiong pake tjelana.
Sentiong ada koeboeran Tjina,
Tjaboet roempoet loeka di tangan,
Siang kiong pake tjelana,
Sang tjipoet pake setangan.
Sair di karang si ikan djapoe,
Matanja terang seperti lampoe.
Ibarat saja lah koepoe-koepoe,
Djatoh di darat tida jang sapoe.
Sair di karang si ikan betok,
Matanja merah mati di ketok,
Dasar saja oentoeng sebatok,
Di takar moendjoeng lah dia rontok.
Sair di karang si ikan gaboes,
Boemboenja banjak serba di tamboes,
Djikaloe nona proentoengannja bagoes
Barang di gade djadi keteboes.
Sair di karang si ikan tjoepang.
Bae djoeal di Tanah lapang,
Djangan toean bakal slempang,
Tida saja berhati simpang.
Sair di karang ikan tjetjere,
Boemboenja banjak bertjampoer sere,
Kenapa nona adjak bertjere.
Ingatlah djandji jang kemaren sore.
Sair di karang si ikan sepat,
Matanja merah djalannja tjepat,
Pegimana akal maoe mendapat,
Sebab pikiran lah lagi pepat.
Sair di karang si ikan pidada,
Matanja item seperti lada,
Kaloe di-inget tempo jang soeda,
Menarik napas tepok lah dada.
Sair di karang si ikan tembang,
Soedah di datjin baroe di timbang,
Pegimana ati tiada maoe bingbang,
Di bawah sanggoel di atas kembang.
Sair di karang ikan sembilang,
Koelitnja poetih dagingnja belang,
Djikaloe bosen nona lah bilang,
Boleh saja anterin poelang.
Sair di karang si ikan lempoek,
Toelangnja kakoe isinja empoek,
Djikaloe ada mas inten bertoempoek,
Sanak soedara semoewa rempoek.
Sair di karang si ikan loendoe,
Pandei berkawan di tempat tedoe,
Sakit rasanja badan jang rindoe,
Ati di dalem rasa beradoe.
Sair di karang lah ikan teri,
Boentoetnja tadjem sebagi doeri,
Sakit rasanja saja jang peri,
Siapa jang maoe lah soedi tjari.
Sair di karang ikan poenja penamba,
Djangan ditjela karangan hamba,
Sekalian dengar njonja dan baba,
Djikaloe salah toeloengken roba.
Sair di karang poenja samboengan,
Memangken saja poenja karangan,
Saja bikin lebih pandjangan,
Nona jang dengar djadi girangan.
Sair di karang ditamba lagi,
Saja mengarang keliwat pagi,
Soedahlah rata jang saja bagi,
Saja pikir tidaken roegi.
-si Nona Bujang
