Sair Oedjan Aboe (Naskah Asli)
Krakatau petjah goenoeng Karang,
Apinja lompat, sorotnja terang,
Boenji geloedoek sangkanin perang,
Manoesia mati beriboe orang.
Krakatau petjah berasap aboe,
Karangnja lompat, gonoengnja roeboe,
Di mana negri pada keleboe,
Manoesia mati beriboe-riboe.
Aer laoet naek di darat,
Allah ta'ala kirimin soerat,
Jang mana mati pada melarat,
Aernja datang dari acherat.
Krakatau petjah geledak geledoek,
Karangnja lompat sangkanin bedoek,
Banjak manoesia lah pada iboek,
Boemi tergerak sangkan geloedoek.
Anak kepiting mendjepit kerang,
Gantoeng antjak atas kelamboe,
Pasang koeping biarnja terang,
Saja merantjak si oedjan aboe.
Gantoeng antjak atas kelamboe,
Petik delima koe dengan arak,
Saja merantjak lah oedjan aboe,
Koeliling roemah pada begerak.
Petik delima koe dengen arak,
Beli peroenggoe di roemah bola,
Koeliling roemah pada begerak,
Ari Minggoe lah moela-moela.
Beli peroenggoe di roemah bola,
Dari toko pegi di Kongkoan,
Ari Minggoe lah moela-moela,
Tempo ada tjioko di Patekoan.
Dari toko pegi di Kongkoan
Kembang tjoelan boengah ketoepat,
Tempo ada tjioko di Patekoan,
Boelan tanggal doewa poeloeh ampat
Kembang tjoelan boengah ketoepat,
Petik laboe di Pasar Senen,
Boelan tanggal doewa poeloeh ampat
Oedjan aboe toeroen ari Senen.
Petik laboe di Pasar Senen,
Kilap ada setengah djalan,
Oedjan aboe toeroen ari Senen,
Moelain gelap poekoel sembilan.
Kilap ada setengah djalan,
Pentang tali djangan di tjaboet,
Moelain gelap poekoel sembilan,
Orang lari lah kalang kaboet.
Pentang tali djangan di tjaboet,
Mangga kaer petik jang mateng,
Orang lari lah kalang kaboet,
Trada lama aernja dateng.
Mangga kaer petik jang mateng,
Toekang lankan mendjoeal garem,
Trada lama aernja dateng,
Di Pasar Ikan kabarnja karem.
Toekang lankan mendjoeal garem,
Ambil nampan bermoeat kentang,
Di Pasar Ikan kabarnja karem,
Liat sampan malang melintang.
Ambil nampan bermoewat kentang,
Pasang lankan di atas tembok,
Liat sampan malang melintang,
Banjak ikan lah pada mabok.
Pasang lankan di atas tembok,
Ambil kerang di dalem mangkok,
Banjak ikan lah pada mabok,
Semoea orang pada menanggok.
Ambil kerang di dalam mangkok,
Petik tjeremè koe dengen tali,
Semoea orang pada menanggok,
Sampe rame di pinggir kali.
Petik tjeremè koe dengen tali,
Beli bakoel di pasar pagi,
Sampe rame di pinggir kali,
Aernja poekoel koeliling negri.
Beli bakoel di Pasar pagi,
Toekang birmat mendjoeal garem,
Aernja poekoel koeliling negri,
Kampoeng Kramat lah soedah karem.
Toekang birmat mendjoeal garem,
Toewan sekaoet menoelis soerat,
Kampoeng Kramat lah soedah karem,
Aer laoet naek di darat.
Toewan sekaoet menoelis soerat,
Gandaria boengah melati,
Aer laoet naek di darat,
Banjak manoesia lah pada mati.
Gandaria boengah melati,
Ambil kwini di dalam kisa,
Banjak menoesia lah pada mati,
Sampe kompeni datang pereksa.
Ambil kwini di dalam kisa,
Peres santen bertjampoer kapoer,
Sampe kompeni dateng pereksa,
Dengar di Banten lah oedjan loempoer.
Peres santen bartjampoer kapoer,
Toekang korma mendjoeal soemboe,
Dengar di Banten lah oedjan loempoer,
Semoea roemah lah pada roeboe.
Toekang korma mendjoeal soemboe,
Ambil kentang boengah melati,
Semoea roemah lah pada roeboe,
Sampe binatang lah pada mati.
Ambil kentang boengah melati,
Ambil kana dengan kekara,
Sampe binatang lah pada mati,
Sebab di Tjina lah hoeroe hara.
Ambil kana dengan kekara,
Boengkoes tepoeng di daon laboe,
Sebab di Tjina lah hoeroe hara,
Kabar di Lampoeng pada keleboe.
Boengkoes tepoeng di daon laboe,
Ambil kenari di dalam bakoel,
Kabar di Lampoeng pada kelaboe,
Sampe jang lari tenggelem timboel.
Ambil kenari di dalam bakoel,
Toekang kerang djoeal tetampa,
Sampe jang lari tenggelem timboel,
Kampoeng Semarang tiada kenapa.
Toekang kerang djoeal tetampa,
Gandaria di atas medja,
Kampoeng Semarang tida kenapa,
Soerabaja lah terang sadja.
Dari Pintoe Ketjil ka Kali Besar,
Orang menjoelam si daon laboe,
Dari ketjil lah sampe besar,
Baroe ngalamin si oedjan aboe.
-si Nona Bujang
