Sair Orang Bersobat (Naskah Asli)
Orang bersobat saja bilangin,
Pindjem barangnja djangan poelangin,
Sekoedjoer badan rasanja dingin,
Lantaran sobat saja gadangin.
Bersobat itoe djangan di pili,
Kendati djelek djangan perdoeli,
Biar abis oewang sa-peti,
Nanti boleh dapet kombali.
Bersobat itoe bae teroesa,
Badan roesak djadi binasa,
Djangan nona hoekoem perkosa,
Sebab dia belon biasa.
Kaloe bersobat djangan terlaloe tjinta,
Biar mendengar saja poenja kata,
Apa oentoeng jang kaja beta,
Djadi badan teloenta-loenta.
Kaloe bersobat bae'an djangan,
Misti dengar saja poenja larangan,
Pegelin ati tjape-in tangan,
Lantaran sobat bakal gadangan.
Bersobat itoe sekalian sanak,
Seperti boeroeng amat djinak,
Kaloe bersobat djangan jang ada anak,
Begini begitoe djadi koerang enak.
Bersobat itoe djadi setori,
Lantaran mara lah sebab siri,
Teroesa djoega lah nona tjari,
Nanti dia dateng kendiri.
Djangan goesar saja ingetin,
Perkara sobat misti tobatin,
Djikaloe dia kena lengketin,
Roemahnja djaoeh dia deketin.
Bersobat itoe paling tjilaka,
Djelek sekali dia poenja tingka,
Djadi orang djangan seraka,
Dapat sobat si toewa bangka.
Paling tjilaka orang bersobat,
Kantongnja bresih kena di babat,
Berdjalan poelang kena di hebat,
Banting kaki berdjalan tobat.
Kaloe bersobat matanja djoeling,
Dia bawa tingkah lah kaja maling,
Oewang abis nona dia goeling,
Tinggal nona djalan koeliling.
Nona bersobat lebih bae berenti,
Soeroeh teboes nona poenja peniti,
Sebab nona setengah ati,
Boeat apa di bela mati.
Bersobat itoe lantaran gelang,
Soedah di pake djangan di bikin ilang,
Djikaloe bosen lah nona bilang,
Nanti saja anterin poelang.
Bersobat itoe lantaran pantok konde,
Barangnja ilang dia teroes gade,
Simpan resia biarlah pande,
Djangan sampe kena orang bade.
Bersobat lantaran giwang,
Djaoeh di gade Kempoeng Krawang,
Mentang saja lah trada oewang,
Baroe sekarang saja di boewang.
Anak ketjil lah baroe besar,
Belon boleh di soeroeh ka pasar,
Saja datang lah djangan goesar,
Sebab saja djalan kesasar.
-si Nona Bujang
