Sair Boedjang Kampoengan (Naskah Asli)

Sair boedjang Kampoengan,

Keliwat pandei djahit stangan,

Ibarat nona barang dagangan,

Boleh di beli di pegang djangan.

Ada boedjanglah di Gang Kodja,

Maoe makan malas kerdja,

Kematnja tadjem seperti wadja,

Toean jang kena lah ingat sadja.

Ada boedjang di Pedjagalan,

Roemahnja dekat di pinggir djalan,

Di lihat terang tjahjanja boelan,

Trada'ken dapat boeat seselan.

Adalah boedjang di kampoeng Baroe,

Moekanja poetjet bibirnja biroe,

Kaloe malem di lihat saroe,

Di lihat siang djadi keliroe.

Ada boedjaug di Pegareman,

Srentalah tjakap dia poenja roman,

Ibarat nona boengah di taman,

Maoe di petik bakal tjioeman.

Ada boedjang di Gedong Pandjang,

Djikaloe tidoer soeka telandjang,

Moekanja tiroes lehernja djoengdjang,

Sajang sedikit mata krandjang.

Ada boedjang tinggal di Orpa,

Itemlah manis dia poenja roepa,

Haroem baoenja seperti doepa,

Tapinja di djoewal tida berapa.

Ada boedjang di Pebamboean,

Kasih bermakan aer di tjawan,

Pikiran koesoet tiada karoewan,

Abis penggoda segala heiwan.

Ada boedjang di kampoeng Melaka,

Dia soeka djalan bertingka-tingka,

Dasaran saja oentoeng tjilaka,

Bakalan masoek api noraka.

Ada boedjang di Pasar Pagi,

Di mana tempat djinek dia pegi,

Itemlah manis badan pesegi,

Trada boleb mendapat lagi.

Ada boedjang kampoeng Tongkangan,

Soeka dia djalanlah koelilingan,

Sepoeloeh djoega di larang djangan,

Dasaran dia tiada pantangan.

Ada boedjang tinggal di Kongsi,

Doedoek makan di waroeng nasi,

Pegimana akal maoe di kasi,

Ibarat koewe lah soedah basi.

Ada boedjang kampoeng Patekoan,

Doedoek menjender di atas lankan,

Tengok di kiri di kanan boekan.

Ada jang lain lah saja soengkan.

Ada boedjang di toko Tiga,

Tadi tinggal di Gang Mangga,

Maoe di boewang lah belon tega,

Rindoenja dateng tiada kedoega.

Ada boedjang kampoeng Pantjoran,

Keliwat pinter membatja koran,

Banjak jang dengar lah pada heran,

Jang mana nona bakal pikiran.

Ada boedjang di tanah lapang,

Soeka nonton komedi Djepang,

Mentanglah mentang si toewan gampang,

Djadi si nonton bakal slempang.

-si Nona Bujang